A categoría contará con seis grupos de dezaoito equipos, con ascenso directo para os campións e playoff para segundos e terceiros.
A conta atrás para o inicio da nova tempada da Primeira Futgal xa está en marcha despois de que quedase definida a composición da competición, que volverá estar estruturada en seis grupos de dezaoito equipos cada un.
No que respecta aos conxuntos de Ferrolterra, serán un total de oito os representantes da mancomunidade nesta edición. O Val, Cultural Maniños, Cedeira, Meirás, Eume Deportivo, Numancia de Ares, Perlío e San Sadurniño compartirán grupo co Sada, Olímpico, Almeiras, Torre, Marte, Relámpago, Victoria, Sporting Coruñés, Imperator e Orillamar, nunha liga que se presenta moi esixente e con numerosos derbis de proximidade.
Pola súa banda, os equipos da Costa da Morte e da zona de Cerceda tamén coñecen xa os seus rivais. Muxía, Xallas, Castriz, San Lorenzo, Club do Mar e Queixas competirán nun grupo que completan Meicende, Cambre, Vizoño, Boimorto, Tordoia, Bertamiráns, Racing San Lorenzo, Luaña, Calo, Bastavales, Praíña e Cacheiras.
En canto ao formato da competición, o campión de cada un dos seis grupos logrará o ascenso directo de categoría. Pola súa parte, os equipos que rematen na segunda e terceira posición disputarán unha fase de promoción para pelexar polas restantes prazas de ascenso. Na zona baixa da clasificación, os tres últimos clasificados de cada grupo perderán a categoría.
A competición dará comezo o vindeiro 6 de setembro, mentres que a fase regular concluirá o 16 de maio, coincidindo coa disputa da última xornada do campionato. Unha vez rematada a liga, chegará a quenda do playoff de ascenso, que arrancará o 30 de maio e finalizará o 20 de xuño, data na que quedarán decididos os últimos equipos que lograrán o salto de categoría.
Foto: Futgal
