O Parrulo Ferrol inicia unha nova etapa coa chegada de Bruno García á presidencia, dando continuidade a un proxecto deportivo con 48 anos de historia.
O club presentou este luns a súa nova xunta directiva nun acto celebrado no Pavillón da Malata, no que participaron todos os seus integrantes, ademais do embaixador da entidade, Adri.
Durante a súa intervención, Bruno García destacou que a nova xunta directiva está integrada por «persoas moi cualificadas nas súas respectivas áreas», cunha estrutura organizativa definida para reforzar o funcionamento do club.
A organización artéllase arredor de seis grandes áreas: operativa e eventos; económica, financeira e legal; social, protocolo e peñas; márketing, negocio e comunicación; Fundación; e deportiva.
Pola súa banda, a área deportiva estrutúrase en distintos departamentos especializados: metodoloxía; scouting e captación; preparación física e fisioterapia; e psicoloxía e orientación.
No ámbito da formación haberá un director da Escola, acompañado polos coordinadores da etapa de psicomotricidade e iniciación, da etapa de tecnificación e perfeccionamento e da sección feminina. No apartado de rendemento, a estrutura estará formada polo director deportivo e o coordinador deportivo.
COMPOSICIÓN DA NOVA XUNTA DIRECTIVA
A nova xunta directiva estará presidida por Bruno García, mentres que David García asumirá a dirección xeral do club.
As tres vicepresidencias recaen en Javier Martínez, responsable da área deportiva; Tomás Llao, á fronte da área social; e Jesús Beceiro, encargado da área operativa.
Na área deportiva, ademais de Javier Martínez, traballarán David González Piñón como director da área metodolóxica; Juan Rivera, director da área de psicoloxía e orientación; e os asesores Bruno Carballo e Óscar Barcón «Canoli».
A área económica, financeira e legal estará integrada por Jorge Fernández, como asesor financeiro; Miguel Ángel López, como xestor deportivo; e Pablo Feliú, tamén como asesor financeiro.
No ámbito de márketing, negocio e comunicación formarán parte Samuel Pantín, director de márketing e negocio, xunto cos asesores técnicos Javier Fidalgo e Pedro García.
A área social, protocolo e peñas, coordinada por Tomás Llao, contará tamén con Adrián Manivesa, responsable de protocolo e asesor legal, e Álvaro Rodríguez, responsable de peñas e membro, ademais, da área de scouting e captación.
Finalmente, a área operativa e eventos, encabezada por Jesús Beceiro, estará integrada por Borja Fernández, como match coordinator, e polas asesoras Beatriz Leira e Ana María Fernández.
O presidente quixo facer unha mención especial ao novo director da Escola, Óscar Vigo, así como ao seu equipo técnico, que será presentado oficialmente nas vindeiras semanas.
Bruno García asegurou que se trata dun proxecto «coidado en todas as áreas do club», co obxectivo de «seguir medrando e escalando, que é o que todos queremos».
Así mesmo, agradeceu o labor da xunta directiva saínte, encabezada por Julio Martínez, pola colaboración prestada durante o proceso de transición. Neste sentido, destacou a vontade da nova dirección de «poñer en valor todo o traballo realizado e medrar xuntos para seguir sendo unha referencia tanto en Galicia como a nivel estatal».
UN PROCESO DE CONFIGURACIÓN COMPLEXO
Pola súa banda, o director xeral, David García, recoñeceu que a configuración da nova xunta directiva «non foi sinxela», xa que foi preciso reunir perfís moi diversos para conformar un equipo capaz de dar resposta ás necesidades de cada unha das áreas do club.
Foto: O Parrulo
