O conxunto carballés renova a confianza no técnico coruñés, que afrontará a súa oitava tempada no club e volverá dirixir ao Calvo Basket Xiria na Terceira FEB, que cumpre a 12ª campaña consecutiva na categoría.
O Calvo Basket Xiria xa ten a primeira peza do seu novo proxecto para a tempada 2026/27. E non é unha peza calquera. Héctor Méndez Vidal (A Coruña, 1984) continuará un ano máis como adestrador do conxunto carballés na Terceira FEB, dando continuidade a unha etapa que vive o seu momento máis brillante despois dunha campaña histórica para a entidade.
A Escola Basket Xiria volverá poñer o seu primeiro equipo nas mans do técnico coruñés, que afrontará a súa oitava tempada no club e a sexta consecutiva como primeiro adestrador. Méndez chegou ao banco do Calvo Basket Xiria como principal na tempada 2021/22, despois de dous cursos como adestrador axudante, e desde entón converteuse nunha das figuras fundamentais do proxecto deportivo carballés.
A renovación chega despois dunha tempada difícil de igualar. O Calvo Basket Xiria asinou unha campaña para a historia ao proclamarse campión da Copa Galicia de Terceira FEB e rematar segundo clasificado no grupo AB, cun balance de 20 vitorias e só 6 derrotas. Unha clasificación que lle permitiu disputar, por segunda vez na historia do club, unha Fase Previa de Ascenso.
O éxito desta última campaña supón o premio ao traballo desenvolvido durante os últimos anos. Despois de varias tempadas nas que o obxectivo principal pasaba por asegurar a permanencia na categoría estatal, o proxecto do Basket Xiria deu un importante salto competitivo. A consolidación do equipo e a evolución do grupo permitiron alcanzar cotas que, ata hai pouco, parecían afastadas.
Nese proceso, Héctor Méndez tivo un papel esencial. A súa continuidade responde precisamente á vontade da directiva e da dirección deportiva, encabezada por Arturo Ferraces, de manter unha liña de traballo que está a dar os seus froitos. O club considera que os méritos do técnico coruñés, así como o seu compromiso, constancia, traballo e implicación coa Escola Basket Xiria, son razóns máis que suficientes para prolongar a súa vinculación.
O acordo, ademais, produciuse con rapidez, nunha mostra da sintonía existente entre ambas as partes. Así, Carballo poderá gozar unha tempada máis de Héctor Méndez á fronte do seu representante nunha competición estatal como a Terceira FEB.
A renovación do adestrador supón tamén o primeiro movemento dun verán no que o Calvo Basket Xiria comezará a dar forma ao seu novo cadro. Nas vindeiras semanas, o club irá anunciando as renovacións e incorporacións que configurarán o equipo para a tempada 2026/27, así como os xogadores júnior da entidade que terán presenza no primeiro equipo.
UN TÉCNICO CON AMPLA EXPERIENCIA
A continuidade de Héctor Méndez tamén reforza a aposta do Basket Xiria pola formación. O técnico coruñés conta cunha longa traxectoria nas categorías de base e posúe o título de adestrador superior desde 2017.
Antes de asumir o mando do primeiro equipo carballés, Méndez desenvolveu unha extensa carreira no Basquet Coruña, onde traballou desde a tempada 2005/06 ata a 2018/19. En total, trece anos vinculados ao baloncesto coruñés que contribuíron a forxar o seu perfil como técnico e, especialmente, como formador.
A súa relación co Basket Xiria comezou como adestrador axudante do primeiro equipo nas tempadas 2019/20 e 2020/21, antes de asumir a dirección do conxunto na 2021/22. Desde aquela, foi construíndo unha identidade propia nun proxecto que combina competición e formación.
A súa experiencia tamén se estendeu ao ámbito das seleccións galegas. Méndez formou parte do organigrama da Federación Galega de Baloncesto e foi un dos técnicos habituais nos combinados autonómicos, especialmente na Selección Galega Cadete Masculina, coa que estivo vinculado durante varias tempadas.
Agora, o reto será dar continuidade ao conseguido. O Calvo Basket Xiria afrontará a súa 12ª tempada en competición FEB, entre a actual Terceira FEB e a antiga Liga EBA, cunha ilusión renovada pero tamén coa dificultade de manter o nivel acadado nun curso extraordinario.
O banco xa ten dono. Héctor Méndez seguirá sendo o encargado de guiar o proxecto. A partir de agora, o Basket Xiria comezará a completar as pezas dun equipo que quere demostrar que o vivido a pasada tempada non foi un punto final, senón o comezo dunha nova etapa na historia do baloncesto carballés.
Foto: Escola Basket Xiria
