A xogadora Carlota Menéndez xogará a próxima tempada nas filas do Baxi Ferrol despois de chegar a un acordo co club departamental.
A base andaluza, que ten 21 anos e mide 1.68 metros, procede das filas do Zamora, na liga Challenge, no que xogou as dúas últimas campañas. Empezou a xogar no Úbeda, pasando posteriormente ao Linares. En categoría junior fichouna o Movistar Estudiantes, co que gañou o Campionato de España junior. Logo incorporouse á disciplina do Milar Córdoba, de Liga Feminina 2 e, logo, xogou en Challenge, onde se enfrontou ao conxunto departamental, e os dous últimos anos formou parte do Recoletas Zamora.
O adestrador do equipo ferrolán, Lino López, destaca sobre a nova incorporación do cadro departamental que “Carlota é unha base que é moi física, capaz de defender a todo o campo, con moi boas pernas para condicionar ás bases rivais e ofensivamente con capacidade para xerar, con moi bo tiro. A súa potencia tamén lle fai ser capaz de desequilibrar no 1×1 e xerar para o equipo. Oxalá siga dando pasos e que teña unha gran estrea na liga Feminina Endesa, como pasou o ano pasado con todas as xogadoras que procedían de Liga Challenge”.
A nova incorporación do cadro departamental destaca que “elixo Baxi Ferrol polo seu proxecto deportivo, a confianza depositada en min e as súas grandes tempadas en anos anteriores”. En canto ao que pode achegar ao equipo, Carlota Menéndez, que debutará na Liga Feminina Endesa, comenta que “achegarei defensa, ganas e moitísima ilusión”. Desta forma, coa fichaxe de Carlota Menéndez, o equipo xa dispón de catro xogadoras tras anunciar a continuidade de Ángela Mataix, Julie Posposilova e Gala Mestres.
CAMPAÑA DE ABONADOS
Ademais, segue aberta a campaña de abonados para poder renovar ou darse de alta. Polo momento, renovaron o seu abono 500 persoas, mentres que se produciron 115 altas. Todas as persoas interesadas poden pasarse pola Taberna Arauxa, no Cantón de Molíns 6, de martes a domingo de 12:00 a 15:00 e de 18:00 a 22:00 horas, así como os luns de 18:00 a 21:00 horas nas oficinas do club no pavillón da Malata. Tamén se poden facer as xestións a través do correo electrónico abonadosuniferrol@gmail.com.
EUROCUP
Tamén no conxunto ferrolán están a facer xestións con administracións e empresas para tentar conseguir os recursos necesarios para que o equipo poida xogar a Eurocup, despois de que o conxunto ferrolán gañase a praza tras a gran tempada realizada. A próxima semana tomarase a decisión definitiva.
Fotos e info: Baxi Ferrol
