Trece xogadores e dez membros do corpo técnico completaron o primeiro adestramento da pretemporada sobre o céspede da Gándara.
O Racing Club Ferrol comezou na mañá de hoxe ás 10:00 horas a pretemporada co seu primeiro adestramento con Pablo López ao mando do conxunto ferrolán sobre o campo da Gándara. Alí citáronse trece xogadores, con dúas caras coñecidas da pasada campaña, o canteirán David Carballo e Aitor Gelardo, sete das fichaxes deste mercado de verán, como son Álex Zalaya, Antón Escobar, Álvaro Juan, César Fernández, Jairo Noriega, Miquel Parera e Pascu, e aos que se sumaron catro xuvenís como Antón Álvarez, Joel Ferreira, Joel Tenreiro e Rubén Piñón. Para o día 21 incorporaranse Álvaro Ramón, Ander Goristidi e Miguel Leal, mentres que outro xuvenil, Daniel González, participará nos adestramentos para partir do venres.
Tras unha pequena charla sobre o círculo central para esa primeira toma de contacto acompañada dunha breve carreira, comezaron os exercicios preparados e supervisados polo corpo técnico, que hoxe presentou ata a dez integrantes sobre o verde da Gándara. Precisamente, o corpo técnico estará cuberto esta tempada por Pablo López á fronte como adestrador, acompañado por David Pérez como o seu segundo, Roberto Valeiro como adestrador do porteiro, Kiko Corredoira como preparador físico e Uxío Romero como delegado, aos que se suma un numeroso grupo de profesionais como José Alcudia e Yerai Garel como encargado de material, Fer López e Miguel Gallego para labores de preparación, Andrés Barcia como analista, Carlos Brage como responsable dos servizos médicos, Alicia Villegas como nutricionista, Manu Romero como podólogo e un par de fisios.
Tampouco quixeron perderse detalles do primeiro adestramento, o director deportivo Álex Vázquez, xunto á súa man dereita, Diego Rivas, que seguen inmersos no mercado de verán para confeccionar un persoal forte que pelexe polo ascenso esta tempada.
O equipo completará esta primeira sesión de adestramento durante a tarde realizando exercicios no ximnasio da Malata e continuará co mesmo sistema nos vindeiros días.
Foto: sadmoody241
