“En Fisterra, se levantas unha pedra, saen catro ou cinco futbolistas”. Con esta declaración tan gráfica e chea de retranca, Gabriel Riveiro López, máis coñecido como Bebeto, presentou o pasado sábado 14 de decembro no Mercado Cultural de Fisterra o seu libro Balóns a Corveiro.
Esta obra é un auténtico compendio de case cen anos de historia do fútbol fisterrán, nunha homenaxe apaixonada a un deporte que marcou a identidade do municipio e da Costa da Morte.
Segundo o propio autor, o título da obra fai referencia a Corveiro, unha praia emblemática situada xusto ao lado da igrexa de Fisterra, separada por un pequeno barranco. Alí, onde hoxe só quedan recordos, existiu un campo de fútbol improvisado a carón dun cemiterio, lugar onde xermolou a afección polo fútbol na vila. Foi tamén o escenario dos primeiros encontros da Liga da Costa en Fisterra. Máis aló das xogadas e os goles, Corveiro converteuse nun espazo de convivencia e sentimento de pertenza, un reflexo da profunda relación entre o deporte e a cultura local que é tan característica dos pobos da Costa da Morte.
O LIBRO, UNHA OBRA MONUMENTAL
En palabras de Bebeto: “Dende os anos 60 comecei a investigar sobre o fútbol en Fisterra, xa que os meus tíos xogaron nesa época e algo coñecía. No ano 2017 tomei a decisión de falar cos protagonistas de todas as épocas, para que me contaran de primeira man os seus recordos”.
A través dun laborioso traballo de investigación, o autor recompilou testemuños, documentos históricos, fotografías e moitos datos estatísticos, dando forma a unha narrativa que se estrutura cronoloxicamente, década a década e “partido a partido”. Entre os achados máis significativos, destacan os primeiros estatutos do Finisterre FC, que datan do ano 1932, cando o propio autor pensaba que non existían documentos oficiais de antes dos anos 60.
Malia o rigor histórico, Balóns a Corveiro non renuncia a un enfoque ameno. Cada páxina está salpicada de anécdotas simpáticas e emocionantes, recollidas grazas á colaboración de moitos protagonistas. Así, o libro logra achegarse a todo tipo de lectores, dende os amantes da historia ata os máis futboleiros.
UN LEGADO INMORTAL PARA O FÚTBOL FISTERRÁN
O traballo de Bebeto é máis que unha homenaxe ao deporte; é un testemuño vivo dunha paixón que transcende xeracións. O autor conseguiu non só plasmar os feitos históricos senón tamén capturar o espírito dunha vila que respira fútbol en cada recuncho.
Balóns a Corveiro é unha xoia da literatura deportiva galega, un libro que non só emocionará a todas as xeracións de xogadores e afeccionados fisterráns, senón que tamén perpetuará a memoria dun dos lugares máis emblemáticos da Costa da Morte. Dende o fin do mundo, esta obra chega para conquistar os corazóns de Galicia e recordar que, no deporte, as raíces e as historias compartidas son tan importantes como o xogo mesmo.
Fotos: Gabriel Riveiro
