Cando faltan sete xornadas para concluír a Segunda RFEF, o Bergantiños FC está desafiuzado.
A última derrota, fronte ao faroliño vermello, o Burgos CF Promesas (0-2) en As Eiroas, puxo sobre o céspede a falta do gol que ten o equipo e iso nesta categoría tan esixente penaliza moito. O equipo agora vese sen fe, algo fundamental para acometer a empresa de dar a volta á dinámica negativa coa que deixou a entidade José Luis Lemos (4 vitorias, 4 empates e 9 derrotas, en postos de descenso). Ademais, o vestiario deixouno feito un volcán e para colmos despois tamén se foi Carlos López, o Pichichi da categoría.
A chegada de José Durán non cambiou o rumbo do equipo. Fichouse, pero os novos non achegaron a dar o que esperábase e o equipo nos nove encontros que leva disputados marcáronse 4 goles e encaixado 13, isto fai que o balance sexa cero vitorias, dous empates e sete derrotas. Un partido que foi clave, o segundo de Durán. En As Eiroas recibíase ao líder Arenteiro e despois dun gran partido dos rojillos, o marcador inxustamente foi de 2-3. O equipo, non o esquezamos, tentouno, pero eses marcadores mínimos fronte ao Avilés (1-0), Palencia Cristo Rey (0-1) ou Laredo (0-1) puideron ser outros moi distintos, pero, novamente, a falta dun home resolutivo na área volveu ser determinante.
O Bergantiños FC no seu último partido, que foi ata o momento fronte ao Burgos FC Promesas, víuselle sen a confianza necesaria. É certo que o meta burgalés, o internacional francés Loïc Badiashile, realizou catro intervencións co 0-0 espectaculares e con elas foise toda posibilidade ou, polo menos, ese golpe de moral despois de encadear dous empates fronte ao Marino de Luanco (1-1) e coa SD Compostela (0-0). Agora hai que reflexionar e comezar a pensar na próxima tempada, na que o Bergantiños FC estará na Terceira División, a súa categoría de referencia. Esta é unha tempada moi especial, como é a do seu centenario.
