A pasada fin de semana, o equipo galego Hoops Eume 3×3 deixou pegada na Master Final do circuíto «Street Basket Tour» celebrado en León.
Tras proclamarse campións na sede clasificatoria de Segovia, os xogadores chegaban con confianza e ambición. O equipo, formado por Pepe Moreno, Jaime Atienza, Santi Fernández e Alejandro Sancho, asinou unha excelente fase de grupos, superando sen derrotas a rivais de alto nivel como o coñecido 3×3 Getafe. En semifinais, lograron impoñerse aos internacionais uruguaios da Celeste, asegurando a súa praza na gran final.
Nun emocionante e disputado partido final ante o equipo local 3×3 León, Hoops Eume cedeu por 11-16, quedándose cun meritorio segundo posto que sabe agridoce polo gran torneo realizado.
O verán, con todo, non fixo máis que empezar. A contorna Hoops xa mira cara a novos desafíos, tanto na pista como na organización. A asociación deportiva segue traballando na promoción do baloncesto 3×3 no norte galego, e xa ten data para o arranque do seu propio circuíto:
Venres 4 de xullo: arranque do Circuito 3×3 Eume coa categoría senior.
Venres 11 de xullo: xornada para categorías U13 (2012-2013) e U15 (2010-2011).
Con iniciativas como estas, Hoops Eume 3×3 consolida a súa aposta polo baloncesto de rúa, o desenvolvemento de talento local e o crecemento do 3×3 na comunidade galega.
Foto: Hoops Eume
