O conxunto ferrolán volverá estar presente na EuroCup Women por terceira tempada consecutiva despois de ocupar a praza que deixou libre o Leganés, que finalmente renunciou a participar no torneo.
O anuncio oficial realizouse este sábado nunha comparecencia na que o presidente do club, Santi Rey, explicou o intenso traballo desenvolvido nas últimas semanas para facer realidade a presenza do equipo na competición europea.
Segundo detallou, tras coñecerse a renuncia do conxunto madrileño, mantivo unha reunión co alcalde de Ferrol, José Manuel Rey Varela, así como con representantes políticos, empresas colaboradoras e diferentes axentes implicados, co obxectivo de analizar a viabilidade económica dunha nova participación continental.
O mandatario explicou que o club estableceu un orzamento asumible para facer fronte aos custos que supón disputar a EuroCup Women e destacou a excelente resposta obtida. Na actualidade, o Baxi Ferrol xa ten comprometido practicamente o 100 % desa previsión económica, un respaldo que permitirá afrontar con garantías este novo reto internacional.
Deste xeito, o equipo ferrolán consolida a súa presenza entre os principais clubs europeos e volverá representar á cidade nun torneo no que xa deixou unha notable pegada nas dúas últimas campañas.
Na mesma comparecencia tamén participou o adestrador, Lino López, quen repasou a situación actual da plantilla de cara á nova tempada. O técnico mostrouse satisfeito co traballo realizado na confección do equipo e asegurou que se conseguiu formar un grupo competitivo e equilibrado, capaz de afrontar con ilusión tanto a Liga Feminina Endesa como a esixente aventura europea.
A confirmación da participación na EuroCup Women supón un importante impulso deportivo e institucional para o Baxi Ferrol, que volverá combinar a máxima competición nacional cun escaparate continental que reforza o crecemento experimentado polo club nos últimos anos.
Foto: sadmoody241
