O Club Salvamento Acuático Laracha (SAL) encara un intenso calendario de competicións nas vindeiras semanas, nas que se decidirán os campionatos autonómicos e as fases finais da Liga Española de Clubes, pechando así a tempada oficial de piscina antes do inicio das probas de praia.
Campionato Galego Infantil e Festival Alevín – Riazor
Este sábado 19 celebrarase na piscina de Riazor (A Coruña) o Campionato Galego Infantil de Piscina, unha das citas máis destacadas da categoría base a nivel autonómico. A xornada dará comezo ás 9:30 horas co quecemento previo, iniciándose posteriormente a competición oficial.
O domingo 22/02 de 16:00 a 18:30 na Piscina Club del Mar – San Amaro (A Coruña) terá lugar o Festival Alevín, unha xornada pensada para seguir fomentando a participación, a aprendizaxe competitiva e a convivencia deportiva entre os máis novos.
O SAL participará cun amplo grupo de deportistas infantís e alevíns, reafirmando o excelente momento da súa canteira e o traballo formativo que se está a desenvolver ao longo da tempada.
Fase Final Liga de Clubs – Categoría Absoluta (28 de febreiro)
O vindeiro 28 de febreiro disputarase a Fase Final da Liga Española de Clubs na categoría Absoluta:
- Primeira División: en Caldas de Reis
- Segunda División: en Arteixo
O Club SAL estará representado na Segunda División, competindo por pechar a liga cun resultado destacado tras unha tempada de grande rendemento colectivo.
Campionato Galego Máster – 1 de marzo (Caldas de Reis)
O 1 de marzo, tamén en Caldas de Reis, celebrarase o Campionato Galego de Piscina Máster, no que o SAL contará con representación, demostrando a amplitude xeracional do proxecto deportivo do club.
Campionato Galego Cadete-Xuvenil – 7 e 8 de marzo (Carballo)
Os días 7 e 8 de marzo, Carballo acollerá o Campionato Galego de Piscina Cadete-Xuvenil, unha cita clave para consolidar o traballo da EXCELENTE base intermedia e continuar sumando experiencias competitivas ao máis alto nivel autonómico.
Campionato Galego Júnior e Absoluto – 14 e 15 de marzo (Ourense)
Finalmente, os días 14 e 15 de marzo, Ourense será escenario do Campionato Galego de Piscina Júnior e Absoluto, que suporá o peche oficial da tempada de piscina 2024-2025.
Peche da tempada de piscina e inicio da praia
Con estas citas autonómicas, o Club Salvamento Acuático Laracha dará por rematada a tempada de piscina, iniciando posteriormente a preparación específica para as competicións de praia, cuxas primeiras xornadas están previstas para finais do mes de abril.
Desde a entidade destacan a importancia deste tramo final da tempada, no que se recolle o traballo desenvolvido durante todo o ano, tanto a nivel técnico como formativo. O club continúa apostando pola formación integral dos seus deportistas, a retención e atracción de talento e a consolidación dun proxecto deportivo en constante crecemento.
O SAL afronta este calendario decisivo coa máxima ilusión, compromiso e ambición competitiva.
Info e foto: SAL
