O conxunto de Juan Riveiro está a mostrarse intratable na Preferente, van oito xornadas e o equipo está primeiro na clasificación
ATLÉTICO ARTEIXO
O Atlético Arteixo, baixo a dirección de Juan Riveiro, está intratable nestas oito xornadas disputadas da Preferente Galicia. O equipo está líder e mostrando a súa forza a base do traballo do conxunto. Un dato moi clarificador é que dos 19 goles que leva, estes foron anotados por once xogadores diferentes e entre eles destaca nesa parcela Iago Blanco, con 5 dianas, que o fai estar no máis alto da clasificación de Pichichi na liga. Riveiro armou un persoal de 20 xogadores cos que fai que a competencia entre todos sexa máxima. A formación está a responder que dá xenio e iso tradúcese nesa marcha que fai que sexan os máis realizadores (19) e os menos batidos, xa que levan tan só dous tantos encaixados. Esta é a quinta xornada consecutiva que lideran a clasificación xeral, na que é a única escuadra do subgrupo 1A que non coñece a derrota.
UNIÓN DEPORTIVA PAIOSACO
Se o conxunto arteixán están en boa predisposición, non menos boa é a imaxe que está a mostrar a Unión Deportiva Paiosaco. A formación de Diego Armando deixou rapidamente esquecidas as tres primeiras xornadas nas que cultivou as dúas derrotas e o empate que teñen na súa marcadora, pero nos catro restantes choques sumou de tres en tres, ata a última rolda disputada, na que volveu ceder unhas táboas no seu campo, nesta oportunidade fronte ao Xallas CF (1-1). Así, a formación está a ocupar a quinta praza e demostrando que cada xornada vai a mais. As aspiracións seguen sendo as máis altas e o equipo non dubida en asimilar a responsabilidade que iso supón.
SD FISTERRA
O outro equipo que tamén está a responder é a SD Fisterra. O conxunto de Juan Porrúa e Juan Cabrejo está, curiosamente un tanto irregular no seu camiñar e así son sextos na táboa clasificatoria. Nas últimas xornadas está a ser un equipo moi castigado polas lesións. No último encontro que xogou en Ponte dos Brozos, fronte ao líder Atlético Arteixo, só dispuxo de dous cambios, debido a que conta con seis baixas nun persoal de 18 futbolistas. A pesar de todo, a formación mantén o pulso para seguir entre o grupo dos conxuntos aspirantes a loitar polas prazas de ascenso de categoría.
XALLAS FC E LARACHA CF
Tanto o Xallas FC como o Laracha CF non acaban de coller o ritmo á competición, e por esa razón están en posicións de furgón de cola. Os xalleiros de David González vén de rabuñar un importante punto no complexo campo A Porta Santa fronte ao UD Paiosaco (1-1). Valioso polo que implica á hora de coller moral e máis confianza nas posibilidades dun equipo novo que practica un bo fútbol, pero a mocidade dos seus homes está a ser unha laxa neste arranque de competición. O equipo buscará esa confirmación nas tres últimas xornadas da primeira volta, co fin de reverter a situación, que o leva a ter 4 puntos despois da disputa de oito xornadas. Finalmente, o Laracha CF, que adestra Alejandro Álvarez, está a realizar bos encontros e neles disputa os tres puntos ata o último suspiro dos enfrontamentos. Pero, por agora, a balanza non se inclina ao seu favor e así presenta unha tarxeta de sete derrota e unha vitoria no que vai de competición. Pero o equipo caeu fronte á SD Dubra (0-1), a UD Paiosaco (4-2) e Sigüeiro FC (2-1), signos que puideron acabar doutra forma e así o equipo estaría nunha posición máis cómoda para seguir ensamblando un conxunto totalmente renovado.
