O equipo ferrolán afrontou onte no Pavillón da Malata o seu segundo test de pretempada, unha nova proba na posta a punto dos departamentais que rematou cunha derrota por 1-5 ante o Braga.
O marcador final non debe agochar unha primeira metade de gran nivel dos locais, que acusaron no segundo período o importante desgaste acumulado, xa que O Parrulo chegaba a esta cita apenas dous días despois de disputar en Chantada o seu primeiro encontro de preparación, no que se impuxera por 5-3 ao combinado de Indonesia para conquistar o Trofeo Terras do Asma. Sen apenas tempo para recuperar forzas, os de Gerard Casas medíanse a un Braga que se mostrou máis fresco fisicamente co paso dos minutos.
O técnico do cadro ferrolán aproveitou o encontro para seguir facendo probas e apostou de inicio por Rikelme como porteiro-xogador nas accións ofensivas. O Parrulo dominou con claridade durante os primeiros vinte minutos, cun equipo moi sólido en defensa, presionando arriba e xerando superioridades nos ataques.
Novoa foi o primeiro en avisar cun disparo, mentres que Luis e Mamadú responderon para o conxunto portugués. Baixo paus, Palazón mostrouse moi seguro e contribuíu a manter o empate. O premio ao bo inicio local chegaría por medio de Brayan, que puxo o 1-0 cun espectacular disparo á escuadra ante o que nada puido facer Léo Souza.
A alegría, con todo, durou pouco. O Braga aproveitou ao máximo unha acción a balón parado e William, libre de marca no segundo pau, rematou ao seu antollo para establecer o empate. O 1-1 xa non se movería antes do descanso, deixando todo aberto para a segunda parte.
Tras o paso polos vestiarios, o factor físico comezou a marcar diferenzas. O Braga tomou o control do encontro, aumentou a intensidade, presionou por todo o campo e mostrouse máis agresivo nas tarefas defensivas. O Parrulo continuaba atopando solucións en ataque, pero cada vez lle custaba máis chegar a tempo nas accións defensivas.
Tiago Brito foi o encargado de poñer por diante aos portugueses e, pouco despois, Barreto ampliou a vantaxe ata o 1-3. Os ferroláns tentaron reaccionar e xeraron oportunidades para recortar distancias, pero faltou acerto na definición para volver entrar no partido.
Entre as notas máis positivas da segunda metade estivo a aparición do xuvenil Lucas. Gerard Casas deulle minutos e o canteirán deixou varios detalles da súa enorme calidade, recibindo incluso as ovacións da afección de A Malata. Unha actuación que deixa entrever o potencial dunha das grandes perlas que vén por detrás no fútbol sala ferrolán.
Nos últimos minutos, e coa intención de buscar a remontada, Yan Matheus exerceu de quinto xogador. O risco acabou aproveitándoo o Braga. Tiago Brito asinou o seu dobrete cun lanzamento desde o seu propio campo á portería baleira e, posteriormente, Claudino repetiu a fórmula para colocar o definitivo 1-5. O marcador mesmo puido ser máis amplo, xa que os visitantes dispuxeron dunha nova ocasión semellante nos instantes finais, pero nesta ocasión o balón acabou estrelándose contra o pau da portería ferrolá.
Así rematou o segundo test de pretempada dun O Parrulo que continúa acumulando minutos, probando alternativas e cargando as pernas de cara ao inicio da competición. A seguinte cita para os de Gerard Casas chegará o venres 21 de agosto, novamente ante un rival de máxima esixencia como é o Illes Balears Palma Futsal, no encontro correspondente ao Torneo Portus Apóstoli.
O PARRULO FERROL: Palazón, Novoa, Yan Matheus, Diogo e Rubén Orzáez; tamén xogaron Quelle, Omar Alshatti, Rikelme, Jhoy, Turbi, Brayan, Caio César e Lucas.
SC BRAGA: Léo Souza, Tiago Souza, Ricardo Lopes, Simao, Claudino; tamén xogaron Tiago Brito, Mamadú, Luis, Barreto, Airoso e Giovanni.
GOLES: 1-0 Brayan (18′), 1-1 William (18′), 1-2 Tiago Brito (22′), 1-3 Barreto (29′), 1-4 Tiago Brito (37′) e 1-5 Claudino (39′).
ÁRBITROS: Héctor Vilas López e Roberto Amor Vizoso, e Berta García Vázquez como asistente.
Foto: sadmoody241
