A praia das Salseiras, en Caión, acollerá o vindeiro sábado 5 de setembro a quinta edición de Caión Games, un evento único en Europa que reúne nunha mesma xornada dúas disciplinas de táboa aparentemente afastadas, pero unidas por unha mesma cultura: o surf e o snowboard.
Organizado por Caión Surf House, espazo que combina surfcamp e escola de surf, Caión Games chega á súa quinta edición consolidándose como unha celebración que vai moito máis alá da competición. Durante unha xornada completa, o mar, a neve, a música e a comunidade atoparanse en Caión para crear unha experiencia deportiva e cultural diferente.
DO MAR Á NEVE
A xornada comezará ás 11:30 horas na praia das Salseiras, en Caión, co campionato de surf, que dará o pistoletazo de saída a esta quinta edición de Caión Games.
Pero a actividade non rematará co surf. Cando caia a tarde, o evento cambiará de ritmo para dar paso á Sunset Session, unha combinación de deporte, música e ambiente festivo coa que Caión Games celebrará o solpor.
A partir das 19:00 horas, a banda de rock Fuah será a encargada de inaugurar a sesión vespertina cun concerto en directo.
Ás 20:00 horas, Los Pucheros Atómicos tomarán a remuda cunha sesión de DJ que acompañará o comezo do campionato de snowboard, trasladando o espírito das táboas do océano á neve.
A noite continuará con música en directo. Ás 22:00 horas, será a quenda de Black Coffee, banda de punk rock, que poñerá o broche musical á xornada antes dun dos momentos máis agardados da noite.
Ás 23:00 horas terá lugar a entrega de premios, poñendo o punto final a unha xornada na que surf e snowboard compartirán protagonismo nun mesmo escenario.
Info e foto: Caión Surf House
