O Baxi Ferrol non puido revalidar o título da Copa Galicia tras caer na final ante un Ensino que soubo reaccionar ao bo inicio do conxunto departamental e que, tras un terceiro cuarto decisivo, acabou facéndose coa vitoria por 91-79 no feudo de A Malata.
O equipo de Lino afrontaba a final condicionado polas baixas. Ás xa coñecidas ausencias das checas Sotolová e Galícková, concentradas coa súa selección no Europeo 3×3, e de Gala Mestres, sumouse a última hora a de Sandra Martínez. Catro ausencias de moito peso para unha cita na que o Baxi buscaba repetir a coroa autonómica. Lino apostou de inicio por Esther Castedo, Iva Belosevic, Sydney Shaw, Tayra Eke e Maggie Doogan, mentres que Suso Garrido saíu con Tetiana Yurkevicius, Kristin Williams, Nugh Bosch, Andrea Vilaró e Ekh.
O encontro comezou cun Ensino decidido a mandar. As lucenses saíron lanzadas e asinaron un parcial inicial de 6-0 que parecía marcar o ton da final. Porén, o Baxi Ferrol reaccionou con contundencia. Sydney Shaw e Tayra Eke colleron o mando ofensivo e as ferrolás responderon cun espectacular 0-12 que obrigou Suso Garrido a deter o partido cun tempo morto. O parón surtiu efecto. O Ensino foi recuperando terreo pouco a pouco, aínda que o primeiro cuarto rematou con vantaxe visitante (29-31), nunha batalla ofensiva e de ritmo alto.
A igualdade mantívose no segundo período. O partido converteuse nun intercambio constante de golpes, cun baloncesto dinámico e sen un dominador claro. Cada resposta dun equipo atopaba inmediatamente réplica no outro. Vilaró e Ekh castigaban desde o perímetro para o Ensino, mentres Esther Castedo e Maggie Doogan mantiñan o Baxi no encontro. No tramo final do cuarto, dous triples de Zoe Hernández permitiron ás lucenses achegarse perigosamente, pero o conxunto ferrolán conseguiu conservar unha mínima vantaxe ao descanso cun 52-54.
Todo mudou tras o paso polos vestiarios. O Baxi Ferrol saíu do descanso especialmente desacertado, e o Ensino non desaproveitou a oportunidade. As lucenses elevaron a súa intensidade e atoparon canastra con facilidade para construír un parcial de 10-0 que cambiou completamente a dinámica da final. Vilaró e Dembele puxeron os puntos, mentres Kristin Williams e Garfella castigaban desde a liña de tres para disparar as diferenzas. O Baxi intentou reaccionar da man de Maggie Doogan e Tayra Eke, protagonistas de tres canastras consecutivas que devolveron certa esperanza ás ferrolás. Pero o Ensino tiña o partido baixo control e volveu facer dano desde o perímetro. Zoe Hernández, Kristin Williams e Andrea Vilaró acertaron desde fóra para abrir unha fenda que xa sería demasiado grande cun 78-65 ao final do terceiro cuarto.
Co título cada vez máis preto, o Ensino soubo administrar a súa vantaxe no período definitivo. O Baxi Ferrol lanzouse na procura dunha remontada que lle permitise manter vivo o soño de revalidar a Copa Galicia, pero o conxunto lucense respondeu a cada intento de reacción e pechou todas as vías de auga. As ferrolás non atoparon o camiño para volver meterse no partido e o Ensino acabou celebrando o título en A Malata, precisamente na casa do seu rival, cun 91-79 que certificaba a súa superioridade tras o descanso.
Kristin Williams foi a gran protagonista da final. A xogadora do Ensino foi a máxima anotadora do encontro, con 22 puntos, e ademais levou o recoñecemento de MVP grazas aos seus 19 puntos de valoración. No Baxi Ferrol, Sydney Shaw e Claire Melia remataron con 14 puntos cada unha, insuficientes para evitar que a Copa Galicia mudase de mans. O Baxi, lastrado polas catro baixas e incapaz de frear a reacción lucense tras o descanso, queda así ás portas da revalidación. O Ensino, pola contra, converteu o terceiro cuarto no punto de inflexión dunha final que acabou coroándoo como novo campión da Copa Galicia.
Foto: sadmoody241
