O Baxi Ferrol chegou a un acordo co Valencia Basket para a chegada ao club departamental da pivote mallorquina Noa Morro, en calidade de cedida, ata finalizar a próxima tempada.
A xogadora, que ten 19 anos e mide 1.90 metros, ten unha ampla experiencia a pesar da súa curta idade, xa que ademais de xogar coa Cordá Paterna de Liga Challenge, tamén dispuxo de minutos no Valencia Basket, tanto na liga como na Euroliga.
A deportista balear acabou a tempada cunha media de 10,6 puntos, 8,6 rebotes e 13,7 de valoración, ademais de ser a máxima taponadora da competición. Tamén ten unha ampla bagaxe nas seleccións inferiores de España, coas que obtivo catro medallas. Na U17 colgouse o ouro, mentres que na U18 a prata e participou en dous campionatos coa U20, alcanzando un ouro e un bronce. Neste momento a xogadora atópase concentrada coa selección U20 en Tenerife preparando o Campionato de Europa que se disputa do 6 ao 14 de xullo na localidade lituana de Vilnius.
O adestrador do equipo ferrolán, Lino López, destaca sobre a xogadora balear do cadro ferrolán que “Noa é unha xogadora cun gran futuro. Ten un físico perfecto para xogar ao baloncesto. Ofensivamente é moi polivalente, capaz de tirar de fóra e xogar interior. Defensivamente o seu físico permítelle defender a varias posicións. Estamos con moitas ganas de axudar no noso club a que siga crecendo como xogadora”.
Desta forma, coa chegada de Noa Morro, o equipo xa dispón de seis xogadoras tras anunciar a continuidade de Ángela Mataix, Julie Pospisilova e Gala Mestres e as fichaxes de Carlota Menéndez, Moira Joiner e Noa Morro.
CAMPAÑA DE ABONADOS
Ademais, segue aberta a campaña de abonados para poder renovar ou darse de alta. Polo momento, renovaron o seu abono 606 persoas, mentres que se produciron 143 altas. Todas as persoas interesadas poden pasarse pola Taberna Arauxa, no Cantón de Molins 6, de martes a domingo de 12.00 a 15.00 e de 18.00 a 22.00 horas, asi como os luns de 18.00 a 21.00 horas nas oficinas do club no pavillón da Malata. Tamén se poden facer as xestións a través do correo electrónico abonadosuniferrol@gmail.com
Fotos e info: Baxi Ferrol
