Volveu o espectáculo tras o parón pola Eurocopa e o choque non defraudou cun bonito duelo entre O Parrulo e Industrias Santa Coloma que finalizou con empate 2-2 no Pavillón da Malata.
Regresaba o campionato doméstico da elite tras o parón pola Eurocopa, e facíao ante o seu público, rendendo homenaxe antes do inicio do encontro aos seus dous xogadores, David Novoa, campión europeo con España, e Niko Vukmir, que logrou o bronce co combinado croata. O Parrulo chegaba á 18ª xornada coa vitoria obtida na anterior na cancha do Osasuna, mentres que o Industrias Santa Coloma viña como antepenúltimo da clasificación, pero sendo deses equipos correúdos que poden poñer en apertos a calquera.
Gerard Casas saía co quinteto conformado por Starna, Novoa, Rubén Orzáez, Jhoy e Gonzalo, e Xavier Closas formaba o seu cinco con Frezzatto, Tolrà, Leandrinho, Puchy e Corso. No primeiro tempo foise mandando no marcador o conxunto de Gramenet grazas a un saque de falta moi escorado na banda e que remataba Povill no segundo pau. Neste primeiro asalto, as ocasións foron escasas ata chegar ao ecuador, cando empezou a auténtica festa de oportunidades nas dúas direccións. Por mor do tanto visitante, que ata o momento parecía levar a batuta do xogo, o cadro ferrolán activouse e comezou a xerar ocos na defensa rival, chegando unha e outra vez, tendo Jhoy unha das máis claras dos locais cando quedou só ante Frezzatto e picaba o balón por encima do seteiro, pero o gardameta rozaba o suficiente para que o balón marchásese lambendo o pau, ademais doutra de Novoa, que desde a banda, inventábase unha espectacular vaselina á que Gonzalo, moi forzado, non chegaba a conectar con claridade de cabeza preto da liña de gol.
No segundo tempo, a historia foi distinta. O Parrulo apropiouse do xogo, pero non da fortuna. Saíron moi fortes os de Gerard Casas en busca da remontada, pero unha e outra vez estrelábanse coa muralla de Santa Coloma. Os ferroláns tentábano de todas as formas posibles, con disparos a media e longa distancia de Vukmir ou Malaguti, ou un man a man de Gonzalo. Resistíase o tanto local e o fútbol ten estas cousas, que cando menos o esperas, chega o gol do rival, eses tantos que poden supoñer un xerro de auga fría. Primeiro avisaran cunha boa chegada que o propio Gonzalo tivo que sacar na mesma liña, pero ao intre, Povill finalizaba unha fulgurante contra dos visitantes que deixaba o partido moi costa arriba. Noutros casos, isto sería un golpe psicolóxico, pero en O Parrulo non se entende o de baixar os brazos, non está no dicionario a palabra renderse, e aí foi cando sacaron a súa mellor versión, chegando a empatar o encontro cos goles de Rubén Orzáez, picando por encima do porteiro, e de David Novoa, cun lategazo cruzado por raso desde a banda.
O Parrulo e o Industrias Santa Coloma asinarían un empate moi traballado por ambos os conxuntos e na próxima xornada o equipo departamental visitará a pista do Córdoba.
O PARRULO: Starna, Novoa, Rubén Orzáez, Jhoy e Gonzalo; tamén xogaron Malaguti, Morgato, Turbi, Iván Rumbo, Diogo, Vukmir, Bruno Días e Penezio.
INDUSTRIAS SANTA COLOMA: Frezzatto, Tolrà, Leandrinho, Puchy e Corso; tamén xogaron Povill, Víctor Ramos, Aniol, Kokoro e Medina.
GOLES: 0-1 Povill (14′), 0-2 Povill (32′), 1-2 Rubén Orzáez (34′) e 2-2 Novoa (37′).
ÁRBITROS: Andrés Botella, Fran Castillo, Daniel López (árbitro 3) e Eva López (cronometradora). Amoestaron aos locais Jhoy, Turbi, Malaguti, Starna, Novoa e ao adestrador Gerard Casas, e aos visitantes Tolrà, Corso e Sergi Ramos (staff).
INCIDENCIAS: Partido correspondente á 18ª xornada da Primeira División de Fútbol Sala celebrada no Pavillón A Malata.
Foto: sadmoody241
