Borja Blanco Domínguez (Fisterra, 1987), coñecido como Munitis, é un defensa polivalente que comezou como lateral e nos últimos anos consolidouse como central.
Esta é a súa cuarta tempada no Cee, onde achega experiencia e liderado, tras defender anteriormente as cores do Fisterra, Corcubión, Muxía e Arasolis. A súa traxectoria reflicte compromiso, versatilidade e un profundo amor polo fútbol costeiro.
Como evolucionou o equipo nestas catro tempadas?
Desde que estou aí fomos perdendo aos mellores xogadores todos os anos, e iso íase notando no rendemento do equipo. Cada ano fomos quedando máis abaixo, ata acabar descendendo, por desgraza. Fixemos unha tempada moi mala, a verdade, eramos moi poucos senior e tiñamos que levar sempre a moitos xuvenís, pero o bo é que foron collendo experiencia e este ano, grazas a deus, xa nos está indo mellor. Temos un equipo moi novo, con ganas de traballar e aprender. Se seguen todos no club, o Cee ten equipo para moitos anos.
Como ves o nivel da liga este ano?
Vexo unha liga moi parella. Gustoume moito o Oza, e o Coristanco vese un equipo correúdo que non cede puntos. Para min, eses poden ser os favoritos, pero os que estamos en playoff ou loitando por entrar, non vexo ningún equipo por encima do outro. Será unha liga disputada ata o final. Se queremos conseguir o ascenso, teremos que traballar moi duro, todos os partidos son moi difíciles.
Que che fai sentir orgulloso do vestiario?
O que máis me gusta deste ano é o bo ambiente que hai e as ganas que teñen todos. O ano pasado os resultados non axudaron e foi máis complicado. Custábanos moito xuntar xente para os adestramentos e mesmo para completar as convocatorias, pero este ano cambiou moito iso e nótase no equipo, o bo rollo sempre axuda a ter mellor equipo. E tamén estou orgulloso de competir como competimos todos os partidos con tanta xente nova. A maioría dos rapaces do equipo son senior de primeiro ou segundo ano e xuvenís. Creo que quitándome a min, ao capi e a un par de rapaces de 25, o resto do persoal non pasa dos 20 anos.
Foto: fotofuentes
