Oito tempadas defendendo a indumentaria dos corviños son as que leva o centrocampista de perfil ofensivo, Mauro Romaní Lema (Muxía, 1998), tras unha estancia no Bergan e no Dumbría.
É como o bo viño, co paso dos anos segue incrementando a súa calidade, converténdose en todo un temoneiro nas facetas ofensivas do seu equipo, tomando decisións acertadas nos últimos metros de fronte ao arco rival, cunha vista periférica e moi preciso á hora de descargar balóns aos seus compañeiros, sendo un dos indispensables no once titular.
Que sentes defendendo este escudo durante tantas tempadas?
Xogar no Muxía é a mellor decisión que tomei na miña vida. Xogo no equipo do meu pobo, con amigos de toda a vida e un vestiario incrible. E todo isto competindo a gran nivel e con xente da casa, todos remando polo mesmo. Eu máis non podo pedir.
Que rival consideras que che esixiu máis e por que?
A nivel individual xogo cos dous mellores da categoría, así que diría Manu Nogueira e Carlos Costa nos adestramentos. E a nivel colectivo, este ano, o partido co que nos vimos máis superados foi contra o Club do Mar.
Como ves o nivel da liga esta tempada?
Está todo moi igualado, vai estar máis apertada que o ano pasado, tanto pola parte de arriba como no descenso.
Foto: fotofuentes
