O Baxi brilla no último cuarto para levar a vitoria

Un gran último cuarto e con Sotolova como heroína valeu para que o conxunto ferrolán sumase a súa sétima vitoria da tempada, escalase ao oitavo posto da clasificación e xóguese o billete á Copa da Raíña na próxima xornada.

O Baxi chegaba á 14ª xornada da liga Feminina Endesa recibindo ao conxunto catalán do Joventut, coas locais cunha bagaxe de seis vitorias e sete derrotas, buscando un billete para a Copa da Raíña, e medíndose a un rival que levaba un balance de cinco vitorias contra oito derrotas. Para o encontro, Lino saíu co seu quinteto de gala formado por Erjavec, Blanca Millán, Moira Joiner, Claire Melia e Lay Daniels, mentres que Jordi Vizcaíno formaba con Ramette, Inés Santibáñez, Dembele, Sivka e Brewer.

O primeiro asalto levoullo o Joventut tras un disputado cuarto que non tivo un claro dominador. Comezou o Baxi dando o pistoletazo de saída cun triplo de Erjavec, pero reaccionaba a escuadra catalá cun parcial de 0-7. As de Lino López reaccionaban a tempo e cortaban a boa dinámica das visitantes, marchándose catro arriba nos últimos minutos de encontro, pero dúas canastras rivais consecutivas propiciaban que o choque volvese igualarse, decantándose a favor do Joventut tras a última canastra de Howard por 15-17.

O segundo cuarto comezou cun +4 para Daniels ao que respondía Piera cun triplo, sendo un bonito duelo anotador entre as dúas xogadoras que protagonizaban un triplo para cada unha a posteriori. O partido tomaba un ritmo eléctrico con intercambio de golpes do que se saía favorecido lixeiramente o Baxi, pero superado o ecuador do cuarto, as locais comezaban a ter varias perdas de balón que aproveitaban as rivais para sumar un parcial de 0-9 e escaparse seis arriba. Karla Erjavec conseguía cortar a sangría cun triplo, pero Piera anotaba practicamente sobre a bucina para marcharse ao descanso cun 31-36.

Tras a volta de vestiarios, o Baxi comezou anotando por medio de Joiner e tras un intercambio de canastras entre os dous equipos, as catalás íanse con nove de vantaxe aos tres minutos de xogo que obrigaba a Lino a solicitar tempo morto. Sentoulle moi ben este pequeno parón á escuadra ferrolá, que chegou a igualar o encontro con Sotolova como heroína, enchufando dous triplos consecutivos e un 2+1. Posteriormente, Daniels poñía ao conxunto departamental por diante con dous arriba, pero Brewer volvía establecer táboas coas que se pechaba o penúltimo cuarto con 50-50.

O último asalto empezou co Baxi consumindo o tempo de posesión, Brewer anotando á contra e Moira Joiner respondendo cun triplo. O partido sufría un atasco no aspecto anotador, cos dous equipos sen lograr encestar ata superar o ecuador do cuarto, rompendo Inés Santibáñez a seca cunha boa xogada individual e posteriormente replicando Erjavec con dous tiros libres que devolvía a vantaxe pola mínima ás ferrolás. Varios ataques errados por parte do Baxi e o bo acerto das rivais propiciaba que as visitantes se fosen tres arriba, pero Sotolova volvía igualar cun triplo. Co público en pé animando ás súas sen parar, novamente a omnipresente Sotolova lanzaba un triplo desde a súa casa para traer o delirio e lograr unha vantaxe de tres puntos arriba nuns últimos minutos da tolemia. No seguinte ataque Brewer lograba capturar un rebote ofensivo e anotar, pero Claire Melia anotaba un triplo. Con catro arriba, Howard lograba sacar tres tiros libres, anotando dous e tendo a oportunidade de enchufar un triplo, pero erraba e Claire Melia sacaba a falta, anotando os seus dous tiros libres e sentenciando o partido por 66-62.

Con esta vitoria, o Baxi conquistaba a súa sétima vitoria da tempada, subindo ao oitavo posto e xogarase o billete á Copa da Raíña no duelo ante o seu rival directo pola posición, o Leganés, ao que visitará na próxima xornada.

Foto: sadmoody241

RESULTADO: Baxi Ferrol 66-62 Club Joventut Badalona