O PARRULO FERROL: O Family Cash Alzira golpea primeiro

Os de Marrube arrincaron o encontro co quinteto formado por Coro, Hélder, Adri, Novoa e Wilson Francia, mentres que os de Braulio Correal saíron con Porky, Carlitos, Peiró, Gabri e Castejón.

Empezaron forte os galegos, dominando nos inicios con presión alta e encerrando no seu campo ao Alzira, que vía como unha e outra vez os locais roldaban o gol, obrigando a Porky a realizar unha gran parada ante un forte disparo de Adri e posteriormente vendo como o traveseiro repelía outro gran disparo do capitán ferrolán. Pronto estas oportunidades ían atopar o premio co primeiro tanto da tarde ao colocar un pase perfecto de Adri para Hélder, que non perdoaba a Porky e superáballe cun disparo raso establecendo o 1-0 no electrónico.

O Parrulo seguía chegando con perigo unha e outra vez, pero o Alzira comezou a aparecer no partido, achegándose co paso dos minutos ás inmediacións de Coro. E nunha desas chegadas, os visitantes igualaban o encontro 1-1 cun gran lanzamento de falta executada por Carlitos e que a poñía na mesma escuadra.

Este gol sentou mal aos ferroláns e resucitou ao Alzira, que comezou a facerse dono do encontro. Nunha nova chegada dos valencianos, o balón entraba e golpeaba no pau do interior da portería, pero os colexiados interpretaron que o balón impactara sobre o traveseiro e non concederon o tanto a pesar das protestas dos visitantes. Na seguinte xogada, o Alzira poñeríase por diante 1-2 co tanto de Peiró que batía a un tempo por abaixo.

O público empuxaba ao Parrulo para que non viñesen abaixo e aos poucos os ferroláns volvían recuperar o control do xogo, forzando aos rivais para cometer a sexta falta e provocar o dobre penalti. Adri lanzou, pero fallou cunha boa parada de Porky, aínda que o lanzamento tívose que repetir ao adiantarse o gardameta do Alzira. Nesta segunda oportunidade, Adri non perdoou e puxo o empate 2-2 co que ambos os conxuntos marcharíanse aos vestiarios.

Na segunda metade o Alzira saíu mellor, presionando moi alto e atopouse co 2-3 nun man a man que Peiró definiu moi ben ante Coro, para minutos despois, o mesmo protagonista, ampliara a vantaxe 2-4 con outro un contra un co que volvía bater ao porteiro local.

O Parrulo, arriscando con porteiro-xogador, buscaba recortar a vantaxe e íao a conseguir tras unha boa xogada colectiva que terminaba cun disparo de Rumbo e que Gabri Pastor coábase na súa portería, subindo o 3-4 ao marcador. Este tanto daba ás aos ferroláns, que buscaban empatar o encontro co seu xogo de cinco, pero o Alzira volvería golpear tras unha perda dos locais e que Naranjo aproveitaba nun bo contragolpe para colocar o 3-5.

Quedaba aínda tempo para a reacción e os ferroláns sabíano, e aproveitando de novo a Wilson Francia como porteiro-xogador, volveron recortar distancia tras un centro de Keita e que o propio Wilson remataba de primeiras para poñer o 4-5. Con este marcador e a bancada empuxando aos seus, todo facía presaxiar que viviriamos unha remontada dos ferroláns, pero foi o Alzira quen sentenciou o encontro e apagou os ánimos con tres mazazos consecutivos. Primeiro Peiró aproveitaba unha perda local para marcar desde o seu campo o 3-6 e o seu cuarto gol na súa conta persoal. A continuación, unha nova perda propiciaba un contragolpe que culminaba Castejón para establecer o 4-7 e posteriormente, o porteiro Serra marcaba desde a súa área o 4-8.

Nos segundos finais O Parrulo anotaría o 5-8 definitivo nunha xogada na que Adri deixaba para Hélder, que lograba anotar cun forte disparo desde fóra da área.

Con este resultado, o Family Cash Alzira leva o primeiro duelo de playoff ante O Parrulo Ferrol FS, que terá que visitar o Palau d´Esports o sábado 27 ás 18:00 horas coa obrigación de vencer para forzar o terceiro encontro no Pavillón da Malata.