A Copa da Costa de Veteranos xa quenta motores para unha final que promete emocións fortes, pois o vindeiro domingo, ás 11.00 horas, San Pedro de Castriz converterase no escenario dun auténtico partidazo entre o San Román e o Atlético Carballo, dous conxuntos que chegaron á gran cita demostrando un enorme potencial ao longo de toda a competición.
O cadro larachés, subcampión da liga, construíu un camiño cara á final baseado na solidez e na competitividade. Na fase previa deixou fóra ao Cances tras vencer por 2-1 no Municipal da Laracha. Xa nos oitavos, tamén no seu feudo, protagonizou un intenso derbi fronte ao campión ligueiro, o San Ramón, ao que superou novamente por 2-1. Nos cuartos de final mostrou toda a súa autoridade cun contundente 4-0 diante do Ponteceso e, nas semifinais, certificou o pase á final cun serio triunfo por 0-2 ante o Razón en El Arenal.
Pola súa banda, o Atlético Carballo chega á cita tras unha traxectoria espectacular, marcada pola súa enorme capacidade ofensiva. Os carballeses, terceiros na liga, comezaron goleando ao Leiloio por 0-7 na Feira Nova. Nos oitavos repetiron exhibición ofensiva cun 1-6 fronte ao Oza en O Carral. Nos cuartos volveron asinar outra goleada, esta vez por 1-6 ante o Cabana nas Redondas, mentres que nas semifinais arrasaron ao Corme cun contundente 0-7 no Cairo.
Todo apunta a unha final moi igualada entre dous equipos que atravesan un gran momento. O Atlético Carballo destaca polo seu tremendo potencial atacante, con Iván Rojo e Álex Figueiras liderando a clasificación de goleadores da copa con oito e sete tantos respectivamente. En fronte estará un San Román que leva toda a tempada demostrando ser un bloque compacto e moi difícil de superar, tendo en Mario Casal á súa principal referencia ofensiva, con catro dianas no torneo.
San Pedro de Castriz prepárase así para acoller unha final de alto nivel entre dous auténticos equipazos que chegan lanzados e coa ilusión de conquistar o título copeiro.
Foto: fotoschimpi
