Un dos gardiáns da meta carballesa é Xoel Calviño Regueiro (Ordes, 2005), que chegou ao Lubiáns procedente do Ordes para achegar os seus grandes reflexos, axilidade, técnica e o liderado dentro da pista para dirixir aos seus.
Que obxectivos individuais e colectivos marcácheste?
Obxectivos individuais non adoito plantexarmos, prefiro centrarme nos obxectivos do club e do propio equipo, xa que os considero máis importantes. Aínda así, se tivese que escoller un, sería o de dar o mellor de min e aportar todo o posible ao equipo. En canto ao obxectivo colectivo, témolo todos bastante claro, conseguir unha das dúas prazas de ascenso, a ser posible a primeira.
Como valoras a túa evolución nesta segunda tempada no club carballés?
Esta tempada non notei cambios respecto á primeira, xa que dende o primeiro momento me sentín moi cómodo neste club. Tanto os meus compañeiros como a directiva e afección tratáronme coma un máis dende o inicio e fixéronme sentir apoiado en todo momento.
Que consellos adoita darche o técnico e os máis veteranos?
Os consellos máis recorrentes por ambas partes adoitan ser os mesmos, pero máis aló dos típicos: traballar, esforzarse e ser un equipo, destacaría o de falar cos compañeiros na pista, xa que dende a miña posición son quen mellor ve o transcurso do xogo dende dentro da pista e poido ver erros na defensa para tentar corrixilos.
Foto: fotoschimpi
