O piloto da Laracha sae a medirse cos mellores do Campionato de España de Ralis de Terra tras a súa vitoria en Portas.
Daniel Remuiñán e Álvaro Cerqueiras disputan esta fin de semana o Rallye Terra de Galicia, unha cita especialmente emotiva para o equipo ao celebrarse na contorna de Carballo, en pleno territorio de «casa» para o piloto larachés. A parella chega á proba galega do nacional de terra cun excelente ritmo de competición tras a vitoria na Clase B e a terceira posición absoluta acadadas no Rallymix de Portas, confirmando a posta a punto do seu Škoda Fabia R5 Evo.
A proba carballesa trae grandes recordos deportivos para a parella, que na edición anterior realizou unha brillante actuación, dominando a súa categoría e rodando moi preto das primeiras posicións da clasificación xeral antes de sufrir unha saída de pista. Nesta ocasión, o equipo afronta os treitos co obxectivo de dar a batalla na zona alta e loitar polas posicións de podio diante da súa afección.
«Correr en Carballo sempre é moi especial porque estás diante da túa xente e os treitos son os de casa. O ano pasado estabamos facendo unha gran carreira, cun ritmo incrible, preto dos mellores, e quedeime coa espiña cravada pola saída de pista. Dános unha motivación extra para esta fin de semana», sinala Daniel Remuiñán. «Chegamos con moita confianza tras as boas sensacións e o resultado de Portas. O coche vai perfecto, así que sairemos facer o noso rali, gozar coa afección e loitar con todo para intentar meternos no podio».
RALLYE TERRA DE GALICIA
| Día | Horario | Treito | Km |
|---|---|---|---|
| Venres, 4 de setembro de 2026 | 18:04 h | TC1SS – SS Circuíto de Autocross de Arteixo | 2,30 km |
| Sábado, 5 de setembro de 2026 | 08:46 h – 11:35 h | TC2 – 4: Coristanco | 10,00 km |
| 09:36 h – 12:25 h | TC3 – 5: Malpica – Ponteceso | 11,31 km | |
| 15:24 h – 18:17 h | TC6 – 8: Cerceda – A Laracha | 19,69 km | |
| 16:27 h – 19:20 h | TC6 – 8: Carballo | 10,13 km |
Total de quilómetros cronometrados: 104,56 km
Info e foto: Daniel Remuiñán
