Os dous integrantes do conxunto carballés tiveron un papel destacado no triunfo de España na competición disputada en Irlanda.
Brais Pensado e Noah Quintela, deportistas do Club Sysca, veñen de proclamarse campións de Europa júnior na modalidade de praia coa selección española. A competición reuniu durante o sábado e o domingo na cidade de Donegal, en Irlanda, a socorristas dalgúns dos mellores países do continente europeo. As 27 medallas acadadas ao longo das dúas xornadas permitiron a España coroarse como a mellor selección do campionato.
Por primeira vez, dous integrantes do Club Sysca representaban o combinado nacional nun Campionato de Europa, e os resultados foron inmellorables. Brais Pensado colgouse o ouro na proba de carreira con táboa, así como nos relevos de rescate con tubo e de ocean mixto. Tamén conseguiu a medalla de prata na carreira con ski, no ocean e no rescate con táboa.
Pola súa banda, Noah Quintela levou o ouro nas dúas probas individuais de area, sprint e bandeiras. Ademais, ambos formaron parte do cuarteto que se proclamou campión de Europa tanto no relevo de sprint como no de ocean.
Info e foto: Sysca Salvamento
