O club ferrolán aproveitou a tarde deste luns para dar a coñecer no Parque Ferrol a primeira equipación coa que competirá como local na EuroCup Women, unha camisola que introduce o dourado como principal novidade e que, ao mesmo tempo, mantén a esencia da cidade.
O acto contou coa presenza das xogadoras Sydney Shaw, Karolina Sotolova, Tayra Eke e Katerina Galickova e estivo conducido por Javi Masaguer, responsable de marketing da entidade. As catro xogadoras foron as encargadas de mostrar parte da roupa deportiva que acompañará ao equipo ao longo dunha tempada na que o conxunto ferrolán volverá medirse con equipos do continente.
A atención centrouse especialmente na nova primeira equipación europea. Foi Katerina Galickova quen asumiu o protagonismo para descubrir unha camisola diferente das habituais, na que o dourado ocupa boa parte do deseño e lle achega unha imaxe propia para os encontros da competición continental.
Máis alá da cor, a nova camiseta tamén busca representar a identidade ferrolá. Na zona inferior aparecen varias siluetas en azul que reproducen elementos característicos da cidade, con referencias ás grúas de Navantia e á entrada do Arsenal. Deste xeito, o club incorpora parte da paisaxe local a unha equipación que estará presente nos desprazamentos e partidos europeos do BAXI.
A xornada deixou tamén outra estrea. Sydney Shaw foi a encargada de amosar a nova colección de sudadeiras do club, unha proposta que estará dispoñible para os afeccionados nos próximos días.
Despois da presentación, chegou un dos momentos máis agardados polos máis novos. Os seguidores que acudiron ao Parque Ferrol achegáronse ás xogadoras, coas que compartiron fotografías e sesións de autógrafos. O ambiente completouse cos sorteos organizados polo club, que puxeron o broche final á actividade. Entre os premios había cinco entradas dobres para o encontro de EuroCup Women previsto para este xoves e unha camiseta da nova equipación europea.
Así, o BAXI Ferrol puxo rostro e cor á súa próxima aventura continental. O dourado será o protagonista dunha camiseta que, ademais de diferenciar ao equipo na EuroCup Women, levará consigo varios dos símbolos máis recoñecibles de Ferrol.
Foto: sadmoody241
