Daniela Cabado Esmorís (A Laracha, 2009) é unha escolta cun destacado talento ofensivo e unha notable capacidade para o tiro exterior.
Formada no CB Laracha, o seu crecemento deportivo levouna a competir durante tres tempadas no Culleredo, onde disputou dous Campionatos de España, chegando aos oitavos de final en ambas as dúas ocasións. De regreso ao seu club de orixe, consolidouse como unha das mellores especialistas no lanzamento de tres puntos do campionato ligueiro, sendo unha ameaza constante desde o perímetro.
Como vos sentides coa vosa gran campaña en Primeira Nacional?
Estamos súper orgullosas cos resultados que estamos a obter. Desde o principio traballamos moitísimo e, aínda que tivemos algunhas fochancas durante a tempada, todo ese esforzo está a verse reflectido.
Es unha das mellores tiradoras de tres da categoría, esperabas este rendemento?
A verdade é que non mo esperaba, pero o acerto da tempada pasada deume moita confianza e, co apoio das miñas compañeiras en cada partido, fun mellorando o meu tiro. Estou moi contenta de poder achegar así ao equipo.
Cal é a clave para manter ao equipo tan unido?
Creo que a clave é o bo ambiente que creamos. Levámonos moi ben dentro e fóra da pista, apoiámonos mutuamente e sempre estamos aí unas para as outras. Iso ao final reflíctese no noso xogo.
Foto: fotoschimpi
