Os resultados non fixeron xustiza ao bo persoal que reúne o Valdoviño esta tempada, que conta con xogadores de moita calidade como é o caso do dianteiro Noel Caramés Río (Ferrol, 2004), máximo artilleiro do seu equipo e que destaca pola súa mobilidade, boa definición ante os porteiros rivais, a garra e que achega moita mocidade, sendo a súa segunda tempada no conxunto valdoviñés tras formarse nas categorías inferiores do Racing.
Para Noel, a experiencia nestas dúas tempadas no equipo dirixido por José Carlos Teijeiro está a ser “bastante boa en xeral, estes dous anos de modestos aprendendo e adaptándome á categoría e aínda que este ano está a ser máis difícil, estou a gozar do bo grupo que temos e traballando para mellorar a situación”.
Como bo seareiro e en especial cazagoles, o ferrolán ten dous grandes referentes como son “Joselu, por todos os anos que pasou no Racing e por todo o que foi, e outro que sempre me gustou e fixábame nel é Luis Suárez”.
Os dianteiros sempre gardan na súa memoria algún gol que significou moito para eles, e no caso de Noel, os seus tantos máis especiais puideron ser “o meu último co Racing contra o Calasanz, por ser o 1-0 no último minuto, ou esta tempada contra o Perlío, o empate, por ver os meus amigos e os meus pais na bancada celebrándoo”.
Foto: Sadmoody241
