O club larachés competiu durante seis días consecutivos nos Campionatos de España Xuvenil, Júnior e Absoluto de Praia, acadando dous títulos nacionais, unha prata, un bronce e numerosas clasificacións entre os mellores equipos e deportistas de España.
Carballo, setembro de 2026. O Club Salvamento Acuático Laracha (SAL) pechou unha intensa semana de competición nacional na praia de Razo, en Carballo, onde participou durante seis días consecutivos nos Campionatos de España Xuvenil, Júnior e Absoluto de Praia.
Entre os días 1 e 3 de setembro, o club competiu no XXXVIII Campionato de España Xuvenil e Júnior de Praia. A continuación, entre os días 4 e 6 de setembro, a expedición larachesa participou no XXXVIII Campionato de España Absoluto de Praia.
O balance global destas dúas grandes citas nacionais deixa para o SAL títulos, medallas, clasificacións destacadas e unha importante experiencia competitiva fronte aos mellores clubs e deportistas do panorama español.
XXXVIII CAMPIONATO DE ESPAÑA XUVENIL E JÚNIOR DE PRAIA
1-3 de setembro | Praia de Razo, Carballo
O SAL confirmou durante as tres primeiras xornadas o nivel da súa canteira, competindo entre os mellores clubs nacionais e acadando resultados de especial relevancia tanto nas clasificacións individuais como nas probas por equipos.
No cómputo por clubs, o SAL acadou a 6ª posición nacional na categoría júnior e o 13º posto na categoría xuvenil.
Por categorías e sexos, os resultados colectivos foron especialmente significativos:
- 6º equipo júnior masculino de España
- 7º equipo xuvenil feminino de España
- 9º equipo júnior feminino de España
- 17º equipo xuvenil masculino de España
EQUIPO XUVENIL
Dous títulos nacionais para Iria Barreiro: A gran protagonista individual da competición foi Iria Barreiro Matos, que se proclamou campioa de España en Sprint e en Bandeiras na praia na categoría júnior, asinando un dobre título nacional. A deportista do SAL completou ademais a súa participación cunha 20ª posición na proba de Ocean.
Tamén na categoría júnior destacou Miguel Salorio Campi, que conseguiu o título de subcampión de España na Carreira con Ski de Salvamento, ademais dunha 11ª posición na Carreira con Táboa.
Entre os resultados individuais máis destacados situáronse igualmente:
- Luis Negreira Mariño, 5º de España en Banderas na praia.
- Juan Martín Rodríguez Lafuente, 18º na Carreira con Ski de Salvamento.
- Ouro e prata nas probas colectivas.
O traballo por equipos tamén deixou importantes resultados para o SAL: o club conseguiu unha das grandes alegrías do campionato coa 1ª posición e medalla de ouro no Rescate con Táboa de Salvamento da categoría júnior, acadada por Iria Barreiro Matos e Lucía Añón Sánchez.
EQUIPO JUNIOR
- O equipo júnior conseguiu ademais unha 2ª posición no Relevo de Táboa, así como numerosas clasificacións entre os mellores equipos nacionais nas diferentes probas colectivas.
- Na categoría xuvenil, Sofía Mata López proclamouse subcampioa de España na Carreira con Táboa de Salvamento, á que sumou unha 8ª posición na Carreira con Ski.
- Pola súa banda, Shaila Rodríguez Rodríguez conseguiu a medalla de bronce en Bandeiras na praia, ademais dunha 14ª posición en Sprint e outra 14ª posición na Carreira con Táboa.
- Tamén destacou Pedro Caamaño Verdía, que rozou o podio cunha 4ª posición nacional en Bandeiras na praia, ademais de finalizar 18º en Sprint.
- Os equipos de relevos xuvenís situáronse igualmente entre os mellores do campionato, destacando a 4ª posición no Rescate con Táboa e a 5ª posición no Relevo de Ski.
- Lía Parga Mosquera contribuíu tamén ao resultado colectivo cunha 15ª posición nacional na proba de Ocean.
O balance destas primeiras xornadas deixou para o SAL dous títulos de España, unha medalla de prata e unha medalla de bronce, ademais de numerosas clasificacións entre os mellores deportistas e equipos do país.
XXXVIII CAMPIONATO DE ESPAÑA ABSOLUTO DE PRAIA
4-6 de setembro | Praia de Razo, Carballo
Tras a participación nas categorías xuvenil e júnior, o SAL afrontou a máxima categoría nacional no XXXVIII Campionato de España Absoluto de Praia.
- Na clasificación xeral por clubs, o equipo larachés acadou unha meritoria 16ª posición entre os 32 clubs participantes procedentes de diferentes puntos de España.
- Por categorías, o conxunto feminino asinou unha destacada 12ª posición nacional, mentres que o equipo masculino finalizou no 23º posto.
- Cinco resultados dentro do Top 20 nacional.
- A actuación máis destacada do SAL chegou da man de Ana Iglesias Amado, que acadou unha excelente 5ª posición nacional en Sprint absoluto feminino, situándose entre as mellores especialistas do país.
- Tamén o equipo feminino de Relevo Sprint conseguiu unha destacada 5ª posición nacional, confirmando o nivel competitivo do grupo nas probas colectivas.
- Entre os resultados individuais dentro do Top 20 nacional destacou tamén Iria Barreiro Matos, que finalizou 14ª en Sprint e 16ª en Banderas na praia na máxima categoría.
- Shaila Rodríguez Rodríguez conseguiu pola súa banda unha 20ª posición nacional en Banderas na praia, completando os cinco resultados do SAL situados dentro do Top 20 nacional.
- Os equipos feminino e masculino de Rescate con Táboa finalizaron ambos na 9ª posición nacional, confirmando tamén a capacidade competitiva do club nas probas colectivas da máxima categoría.
A participación no campionato absoluto permitiu aos deportistas do SAL medirse coa elite do salvamento e socorrismo español, asumindo o reto de competir fronte a especialistas de gran experiencia e percorrido nacional.
PECHE DUNHA INTENSA SEMANA NACIONAL EN RAZO
Co remate do Campionato de España Absoluto, o SAL pecha seis intensas xornadas de competición nacional en Razo, nas que participou consecutivamente nas categorías Xuvenil, Júnior e Absoluta.
A semana deixa un balance deportivo especialmente positivo, con dous títulos de España, unha medalla de prata, unha medalla de bronce, destacados resultados por clubs e numerosas clasificacións entre os mellores equipos e deportistas do país.
Pero máis alá dos resultados, estes seis días representan tamén o traballo desenvolvido durante toda unha tempada. A capacidade para competir en diferentes categorías, a presenza nas probas individuais e colectivas e a experiencia acumulada fronte aos mellores clubs nacionais reflicten a evolución dun proxecto deportivo que continúa medrando desde A Laracha.
Cada deportista contribuíu, desde a súa participación e compromiso, ao resultado colectivo alcanzado durante estes Campionatos de España. Sabemos que o éxito dun equipo constrúese tamén no traballo de quen compite en cada serie, relevo e proba, facendo posible que o conxunto continúe avanzando.
O recoñecemento faise extensivo ao corpo técnico polo traballo desenvolvido ao longo da tempada, ás familias, voluntarias e voluntarios, e socios amigos cuxo apoio e compromiso continúan sendo fundamentais no día a día do club.
O Club Salvamento Acuático Laracha quere agradecer tamén expresamente o apoio do Concello da Laracha e da Deputación da Coruña, cuxa colaboración contribúe a facer posible a participación dos nosos deportistas nos grandes campionatos nacionais e permite continuar fortalecendo un proxecto deportivo que leva o nome da Laracha e da provincia aos principais escenarios do salvamento e socorrismo español.
Razo puxo o punto final a unha intensa semana de competición, pero tamén deixa un novo punto de partida para seguir traballando, aprendendo e medrando. Unha canteira que compite desde as categorías de formación ata a máxima categoría nacional e que continúa demostrando que o futuro do SAL xa está preparado para seguir asumindo novos retos.
Para máis información, por favor contacte con: Club de Salvamento e Socorrismo de Laracha Correo electrónico: salvamentolaracha@gmail.com ou no teléfono 639 07 88 44.
Info e foto: SAL
